Volume 1 Issue 6 June 2019

Greetings from General Secretary

Pathian dawtnak le daihnak cu nan

dihlak cung ah tlamtling tein nan ta si ko seh!

International Chin Literature Society

(ICLS) meeting cu June 10-11, 2019 ah

Bangkok ah tuah a si. Australia, CACC,

Norway, Bangladesh, India, New Zealand,

CBCUSA in palai tling tein an ra kho.

Biafun biapi deuhdeuh cu: 1) Chin Civui cu Lawngtlai ah May 22-

24, 2020 ah tuah ding, 2) Chin Tuanphung cauk chuah ding; (3) Sunday

School cawnnak a si khawh chung in i hrawm ding; (4) Mizapi nih rel

khawh ding phun Bible hrilhfiah ṭial ding; le Lairam Isua Krista Baptist

Kohhran (LIKBK) nih Halkha Bible le Hla cauk hman khawh kan i zuam ve

lai” an ti mi cung ah lunglawmhnak kan ngei.

United Chin Mission Network (UCMN) meeting cu June 11-12,

2019 ah Bangkok, Thailand ah tuah a si. Australia, Norway, New Zealand,

CACC, Chin Baptist Union (CBU- Falam kan unau), CBANA, CBCUSA in

palai an ra kho. UCMN um khawhnak ding ah 2016 in CBCUSA nih thla a

rak cam. UCMN nih aa hmaithlak mi cu: 1) Mah duhsalam in ram vaih si lo

in, khuapi te khaan hawt in tuan; 2) A pikpak si lo in i hlum te le i

theihthiamnak in tuantinak, 3) Mission fields ah i theihpinak um ding, ti a

si. Thlarau tlau siaherhnk in denomination aa fon kho poh i fon in ram thar

rian tuanti hi UCMN a thlacamnak a si.

Ram thar riantuannak kong biaruahnak zong September 26-30, 2019 ah

Kalaymyo ah ngeih a si lai. Chin miphun denominations kip, mission fields

a ngei mi Khrihfabu poh sawm an si. Thlacamnak le pekchanhnak,

lungrualnak, mission rian tuannak, thlacamnak in hmai ah fong hna usi.

Khuazing Pathian nih CBCUSA le Chin miphun thluachuah pe chin ko seh!!

T. Bawihrin

CBCUSA NUBU

Biak Ṭha Hnem

President

Bawipa nih Nubu zong hmai ah a kan hruai chin lengmang ko.

Pathian a min kan thangthat. Kan budget zong $140,000 tiang kan

thang. Khirhfabu dihlak nubu hi thawhvo le mah thiam ning fund

kawlnak i kan i tel khawh dih ahcun $150,000 cu kan phan kho lai, ti

kan zumh. Hmailei ah hi zawn te ah hin tanlak kan herh ngaingai.

June 28, 2019 ah A voi 4-nak CBCUSA Nubu EC meeting cu

UCCC, Chicago, IL ah tlamtling ngai in kan tuah. Tukum 2019 CBCUSA

Nubu training ah kan tlangtar “Na umnak thlam khauhter” ti a si bantuk

in kan umnak thlam le kan Mission riantuannak zong hi kauh ter ve

ding in khua kan khang hna. UCCC Khrihfabu nih tha tuk in an kan

zohkhenh, an cung ah kan i lawm tuk. Bawipa nih thluachuah pe chin

ko hna seh.

CBCUSA Nubu EC Member (2018 – 2020)

June 29-30, 2019 ah a voi 5-nak Nubu training zong hlunghlai

ngai in Chicago MACCF ah kan tuah kho. Khual lawngte 750 kan si.

MACCF khrihfabu nih an kan zohkhenh ning a tha hringhran; an cung

ah lomhnak kan chim. Tutan kan tlangtar cu Isaiah 54:2, “Na umnak

thlam kauhter,” ti a si. Rev. Dr. Cung Lian Hup nih “Chanthar Mission

Riantuan Ning,” Sayamah Khin May San nih, “Khrihfanu nih

chungkhar, pawngkam le Khirhfabu ah a rian,” timi kong an kan

cawnpiak. Rev. Dr. Chan Thawng Lian nih thawngtha a kan chimh.

Kan thinlung thlam, kan zumhnak thlam le kan khuaruahnak

thlam kauhter cio ding in an kan forhfial. Hlawknak tampi a um, ti kan

zumh. Action Hlaremh zuamnak ah Khrihfabu 8 in kan nule an i tel

kho. 1st JCBC, Florida nih, 2nd CEBC, Indy nih, 3rd MACCF nih an

tinco. Kan GS Rev. Dr. Thlaawr Bawihrin zong nih a thok in a dih tiang

a kan telpi khawh i kan khuakhan lairel a tlamtling khun tiah kan ruah.

Action zuamnak ah thiamhlei pawl: pakhatnak JCBC, FL (cung bik), pahnihnak CEBC, Indianapolis (a lai), pathumnak MACCF (tang bik)

Hmailei kong ah Nubu training kum thum vawi 2 tuah tawn mi

cu tuah ti lo in kum thum dan lengmang i tuah ding in zapi lungtlinnak

ngeih a si. Cun US ramchung nu hna ca i rian thok kho ding in tukum in

working committee zong ser ding ah kan lung a tling. Bawmram ah

Holistic mission tuanding zong tukum in thok ding ah lungtlin nak kan

ngei. Cun CBAUSA program in cawmmi chungin sibawi/engineering a

kai kho ding an um ahcun pakhat cu CBCUSA Nubu nih cawm ding ah

hnatlaknak kan ngei. Ramchung, ramleng cawlcanghnak ah a si khawh

chung in tanlak aa zuam.

Hmailei zongah CBCUSA Nubu hi Bawipa nih hruai chin seh law

a miphun le a ram kauhnak caah nu hna hi hmang chin ko hna seh. Nu

hna kan dihlak kuttlai in kan tanti ah cun thil lianngan pi tuah kho tu

dingah Bawipa nih a kan hman ko lai tiah zumhnak kan ngei.

CBCUSA Nubu Training Sunday Worship Service

ICBM THAWNGPANG

CBCUSA nulepa hna, nan thazang le nan thlacampiaknak thawng in

Kawlram ICBM riantuannak zong Bawipa nih thluachuah a pek i a kal

cuahmah ko. 2018-19 Kawlram Sianginn cacawn kum chung ah CBCUSA

nih ICBM min put in kan zohkhenh mi hna Siangngakchia chung in minung

26 nih tang 10 camipuai an phit i minung 20 an awng (Paletwa in 6; Kanpalet

in 6; Mindat in 4; Gangaw in 4). 76.9 % an awng tinak a si i, kan i lawm

hringhran. Minung 4 nih subject pakhat cio ah distinction an hmuh. ICBM

boarding school rak thokka kum khatnak ah minung 3; kum hnihnak ah

minung 3; kum thumnak ah minung 13 le tutan kum linak ah minung 20; an

dihlak 39 an awmg cang.

Thlanglei Chinram khuasa kan unau hna fimcawnnak ca ah Hakha ah

kan tuah mi High School siangngakchia zong 2019-20 Academic year ca ah

mi thar 40 tluk kan laak chap hna i, an dihlak 80 tluk an si te lai. Thlanglei

Chinmi kan unau hna nih CBCUSA i kan langhter mi dawtnak an i fian chin

lengmang cang ca ah tukum entrance exam a phi mi minung 40 tluk lak ding

ah 350 tluk nih an phit. Minung 40 chung ah Rakhine ram khuasa Chin kan

unau hna zong tlawmpal an i tel ve cang. May thla chung ah khan mi thar

laakmi hna cu mi hlun he pumhnak zong an tuah khawh cang. ><> <><

Rev Dr Van Thawng Lian

Director, Mission Department

General Secretary nih Greetings zawn i a langhter cang bang in

Christian Education & Literature Department Director Pu Thlasui Tluangneh

cu June 10-11, Bangkok, Thailand i tuah mi International Chin Literature

Society meeting a kai kho. Europe, New Zealand, Australia, CACC, Bawm,

LIKBK, CBCUSA ti in, hi meeting kainak ah hin CELD rianṭuan cia, ṭuan lio

mi le ṭuan lai mi reports peknak zong PowerPoints in hmuhsaknak caan a ngei

kho. Hmailei ah cun hmun kip cauk chuah mi PDF in i kuat i, i chuahpiak cio

nak lam a um khun lai, cauk zong a chuak deuh ngai cang lai, tiah zumh a si.

Cu dih in February 2019 Laica Ruatkhangtu Committee Meeting lio

(minung 45 an kai kho) biachahnak in dirh thar mi Chin Linguistic Team

meeting (June 20, 2019 - Hakha) zong a kai kho. Cu meeting ah team minung

8 (Stephen Ni Kio, Kenneth Vanbik, Bawi Tawng, Laiki, Ramdinglian Lahnim,

Roland Siang Nawl, Lai Cung, Thlasui Tluangneh) chung in pakhat lawng a

bau. Thok colh ding rian le hmailei deuh rian, ti in ṭuan awk rian an i khinh,

an i phaw hna. Laica cafang fonh/ṭhen kong ah kum sau tuk chung i

nawnnok lengmang le lungtuai in um ruang ah, Anmah Linguistic Team nih

kan hruai cang hna seh, tiah biachahnak in dirh mi hi team cu CACC

hrihhawhnak in 2020 ah kau deuh pi in Hakha ah Seminar an ngei te lai.

Cun Chin Baptist Convention minung Hakha ah ra in Church School

Curriculum kong an i ceihmaihnak meeting zong CBCUSA CELD Director

cu (mileng dirhmun in) a kai kho rih. Hi meeting cu CACC, CCU, CBC

(tuanlio ZBC) ti in resource persons minung 10 kai mi meeting a si. Sunday

School Curriculum kong ah an harsat cio kong an biachim le an level, an

cawlcangh riantuan ning hmuhtheih le hngalh khawh caan sunglawi tuk a si.

CELD THAWNGPANG